IBRAHIM RUGOVA - IKONA E PAVARËSISË

(“Lidhja Qeparotase në Botë” shpreh dhimbjen e saj të madhe për humbjen e liderit të shquar shqiptar duke e krahasuar ate me Mahatma Gandin e Martin Luter Kingun, njeriun e emancipuar me prirje të theksuara perëndimore i cili pati gjithëmonë si udhërrëfyese, nobelisten tonë të shenjtë Nënën Tereze)

Lajmi për vdekjen e Kryetarit të Kosovës ka goditur opinionin e gjerë kosovar dhe është pritur me pikëllim të thellë kudo, tej e mbanë globit. Në këto ditë dhimbjeje dhe pikëllimi të veçantë, për të gjithë shqiptarët kudo ku ndodhen, brenda e jashtë Kosovës, në emër të “Lidhjes Qeparotase në Botë” dëshirojmë t'i përcjellim popullit të Kosovës, gjithë institucioneve të saj, Lidhjes Demokratike të Kosovës si edhe familjes së Presidentit Rugova, ngushëllimet tona më të sinqerta e njëkohësisht edhe solidaritetin tonë në kapërcimin e kësaj dhimbjeje të veçantë shoqëruar me urimin për realizimin e aspirates së ëndrrës dhe të gjitha përpjekjeve të Tij, realizimin sa më shpejtë të Pavarësisë së Kosovës.

Vdekja e Presidentit Dr. Ibrahim Rugova është një humbje e madhe për popullin e Kosovës dhe për mbarë popullin shqiptar. Një humbje të cilën e ndjen thellë gjithë bota shqiptare pa asnjë dallim. Sepse Ibrahim Rugova ishte dhe mbetet udhëheqësi historik i Kosovës. Ai ia kushtoi tërë jetën e tij ardhmërisë së saj dhe ka një meritë të veçantë në futjen e Kosovës në orientimin e saj drejt pavarësisë. Ibrahim Rugova mishëronte cilësitë më të vyera të popullit të tij. Mençuria dhe urtësia e tij u bënë simbol i rezistencës paqësore - një etapë që do të mbetet e pashlyeshme në historinë e Kosovës. Rezistenca paqësore, lufta çlirimtare dhe sakrificat e popullit prodhuan Kosovën e sotme, një vend që po shkon drejt pavarësisë si një shtet demokratik dhe europian.

Në këto momente të dhimbjes së madhe, humbja e Ibrahim Rugovës - Ikonës së Shenjtë të Kosovës Martire - përbën një apel për popullin dhe klasën politike të saj, për të qenë më të bashkuar se kurrë, në emër të idealeve të mëdha, të cilave Ai u kushtoi gjithë jetën. Edhe njëherë, me pikëllim dhe nderim të veçant, “Lidhja Qeparotase në Botë” i shprehë ngushëllimet më të thella familjes, popullit dhe qeverisë së Kosovës.

Emri, vepra dhe kauza për të cilën luftoi e punoi Ibrahim Rugova nuk do të vdesin kurrë!

Nga Stafi Drejtues i “Lidhjes Qeparotase në Botë”

(22 Janar 2006)